Албански државјанин вчера околу 17 часот на Меѓународниот Аеродром Скопје со тврд предмет нападнал офицер за врски од француската амбасада во Скопје.
Според МВР, нападот се случил бидејќи Т.Р.А.П.Р (43) кога вршел дополнителни проверки за условите за патување на странци во ЕУ, не му дозволил на Е.В. (29) да отпатува кон Барселона.
Според пријавата, во зградата на „Меѓународен Аеродром Скопје“, на шалтер бр.14, Е.В.(29) од Р.Албанија со тврд предмет физички го нападнал Т.Р.А.П.Р.(43) од Франција, офицер за врски од Француската амбасада во Скопје, кој вршел дополнителни проверки за условите за патување на странци за Европската Унија и Шенген држави. Е.В. заедно со неговата сопруга и со нивното малолетно дете се пријавил да патува за Барселона, поради здравствени прегледи на детето, а бил незадоволен од тоа што францускиот претставник не му дозволил да патува во Европската Унија, со образложение дека не ги исполнувал општите условите за влез во ЕУ. Е.В. бил приведен во Полициската станица за Граничен премин „Меѓународен Аеродром Скопје“, а во 21.10 часот бил предаден на полициски службеници од Полициското одделение Петровец за понатамошна постапка.
