Четворицата повредени во железничката несреќа кај Ногаевци се надвор од животна опасност. Тројца се мажи и тие се задржани во Велешката болница, а една е жена на возраст од 50 години која поради здобиените повреди на лицето е пренесена на понатамошно лекување во Скопје.
Портпаролот на Општата болница во Велес, Тодор Јаковлевски изјави дека жената се здобила со фрактура на лицето и оти по укажаната медицинска помош е препратена во Скопје, а двајца од повредените мажи се здобиле со фрактури, додека еден има полесни повреди.
Еден од двајцата потешко повредени има исчашување на колкот и фрактура на чашката на колкот, а вториот има фрактура на ребра.
Во несреќата загина 24-годишно момче.
Несреќата се случи денеска околу пладне меѓу товарен воз, кој сообраќал на релација Трубарево-Градско, и возило „форд галакси“ со велешки таблички кај село Ногаевци на обележан премин со исправна светлосна и звучна сигнализација.
Според првичните информации, повредените биле пациенти на дијализа кои требало да бидат однесени во болница.
Од велешката Железничка станица за МИА изјавија дека железничкиот сообраќај е пуштен за сообраќај по направениот увид од страна на полицијата.
