Членството на земјава во ЕУ ќе придонесе за решавање на црковниот спор и за признавање на Македонската православна црква-Охридска архиепископија (МПЦ-ОА) во православниот свет.
Вакви се очекувањата на дури 42 отсто од православните верници во Македонија, покажува истражувањето што го спроведе Институтот за политички истражувања „ИПИС“, заедно со порталот „Религија“ и Фондацијата „Конрад Аденауер“.
Таму е наведено и дека мнозинството граѓани, односно 44 отсто од испитаниците, сметаат дека по приемот во ЕУ земјава ќе биде обврзана да регистрира и други верски заедници.
Од друга страна, високи црковни извори со коишто разговараше Плусинфо не се согласуваат со резултатите од ова истражување и велат дека ЕУ не поседува волшебно стапче за да го реши црковниот спор.
– Истражувањето кое покажува дека голем дел од граѓаните очекуваат ЕУ со волшебно стапче да го реши црковниот спор во земјава, само ги покажува целосниот провинцијализам и неупатеноста на граѓаните, па и на самата власт, во концептот на напредните, европски и демократски вредности. Ако членството во ЕУ, според истото истражување, значи обврска за регистрирање и на други верски заедници, а не штитење на монополот на поедини, тогаш се поставува прашањето зошто во скопскиот судски регистер има повеќе одбиени, отколку регистрирани верски заедници – велат нашите соговорници.
Тие посочуваат дека во клубот на ЕУ нема место за политички примитивизам.
– Во релевантните меѓународни институции, земјава сè уште фигурира како делумно слободна земја, а тоа значи земја на делумно слободни личности. Слободата на вероисповед е неприкосновено право на граѓанскиот општествен концепт. Оттука, кога некогаш ќе постои владеење на правото, тогаш ќе отсуствуваат какви било верски спорови. Бидејќи, верската слобода подразбира верски плураризам, па дури и промена на уверувањето, како и јавна манифестација на таа промена, а такви промени возможно е да се случуваат во верските заедници и откако земјата ќе влезе во ЕУ. Доколку тогаш не би смеело да бидат гонети инакумислечките, следствено не би смеело да бидат гонети и сега, оти во спротивно, политичарите и проблематичното судство, заради приватен бенефит на ловење во матно, ќе ја туркаат земјата сè подалеку од напредните демократски општества на слободата во ЕУ – објаснуваат нашите црковни извори.
Истражувањето на ИПИС покажува и дека влијанието од членството на земјава во ЕУ особено ќе се почувствува во сегментот на заштита на верските објекти, кои се истовремено и заштитени културно-историски споменици. Во тоа веруваат 63 отсто од анкетираните.
На прашањето дали во земјите на ЕУ се почитуваат верските права и слободи, пак, 69 отсто од граѓаните одговориле потврдно, а 14 отсто не се согласиле дека во ЕУ се почитуваат верските права. Дека ќе се подобрат верските права и слободи кога Македонија ќе стане членка на ЕУ веруваат 33 отсто од граѓаните, а 9 отсто рекле дека ќе се влоши состојбата.
