Обвинетиот Бојан Јовановски Боки 13 денеска во Судот рече дека сака да поднесе 19 кривични пријави. Тој денеска рече дека има несоборливи докази за корупција поврзани со обвинителката Вилма Русковска, вредни четири милиони евра и побара нејзино изземање од предметот „Рекет“.
Со изнесување на материјални докази, утре продолжува главната расправа за предметот „Рекет“ во кој се обвинети Бојан Јовановски – Боки 13 и поранешната специјална обвинителка Катица Јанева.
Денеска во судот сведочеа кумата на Јовановски, Мери Дика Георгиевска, стручната соработничка на поранешната специјална јавна обвинителка Катица Јанева, Сања Димовска, управителката на „Зона мебел“, Лидија Младеновиќ, продавачката од продавница за мебел и ТВ водителката Лила Стојановска.
Шефот на кабинетот на поранешната специјалната обвинителка, Димовска на конкретно прашање на обвинителките рече дека во еден период кога Јанева била на одмор добила ургентно барање од судијката Весна Димишкова за укинување на мерката одземање пасош за осомничениот Орце Камчев во предметот „Империја“, за што ја известила шефицата и добила насоки за барањето да ја извести заменичката на Јанева, Елизабета Јосифовска преку нејзината стручна соработничка. На прашање на одбраната дали Катица Јанева дала насоки за тоа на колкав временски период да му биде вратен пасошот на Камчев, таа рече дека Јанева рекла за тоа да одлучи Судот.
Водителката Лила Стојановска рече дека на Боки 13 му помогнала со донација од 25.000 евра и позајмица од 500.000 денари. На прашање на обвинителката дали прво примила 500.000 денари, а подоцна истите ги вратила, Лила рече дека не е точно дека примила, туку дека само таа дала лично нејзини средства.
Управителката на „Зона мебел“ Младеновиќ, од каде што бил набавуван мебел за ТВ1, рече дека за зделката телевизијата ѝ останала должна на нејзината компанија 196.000 денари, но вработена кај Боки 13, по поднесените тужби за долгот од страна на Зона мебел, донела 2.700 евра гаранција за долг.
На крајот на денешното рочиште обвинетиот Боки 13 го извести Судот дека е во лоша здравствена состојба, иако, како што рече, добро изгледа и дека побарал меѓународна здравствена помош. Јовановски рече дека пратил писмо до јавниот обвинител Љубомир Јовески дека е дискриминиран, а за тоа добил одговор дека треба да се обрати во Судот.
Првобвинетиот беше предупреден од Судот дека овие забелешки не се однесуваат на предметот и дека за такви барања е задолжено Јавното обвинителство.
Прочитајте повеќе:
Боки ниту го платил, ниту дал компензација за лускузниот мебел
Боки 13 побара изземање на Русковска, тврди дека има докази против неа вредни 4 милиони евра
Лила: Не сум скарана, но веќе не сме пријатели со Боки!
Мери Дика со мајката на Боки патувала во Милано
Фото: МИА
