Трипартиската коалиција помеѓу Алијансата за Албанците, Беса и Алтернатива нема да стане реалност. Ова за ТВ21 го потврдил генералниот секретар на Алијансата за Албанците, Арбен Таравари.
– Тројната коалиција нема да се постигне. Денес или утре ќе се сретнеме со двете страни, а потоа ќе се собере централното раководство на Алијанса за Албанците за да одлучи со која партија ќе прави предизборна коалиција – посочил Таравари.
Тој не сакал да коментира која од двете партии, Алтернатива или Беса, има поголеми шанси за коалиција со нив.
Од Беса, пак, ја повикуваат партијата на Зијадин Села јавно да ги соопшти причините поради кои одбива да се случи тројната соработка.
– Ако постои виновник во овој процес, тогаш нека ѝ го соопштат на јавноста – истакнал генералниот секретар на Движењето Беса.
Од партијата на Африм Гаши, пак, информираат дека денеска раководството на Алтернатива ќе одлучи за понатамошните чекори.
– Денеска раководството ма Алтернатива ќе одржи состанок на кој ќе се одлучи за следните чекори во врска со предвремените парламентарни избори, конкретно за начинот како ќе се настапи на изборите, како и опциите за можни предизборни коалиции – велат од Алтернатива.
