Бирото за јавна безбедност (БЈБ) има во увид 7.000 телефонски броеви на членовите во затворената група „Јавна соба“ на „Телеграм“, како и тоа кој е администратор на групата, пишува вечерва порталот Локално.
Како што објави Плусинфо претходно, групата „Јавна соба“ е креирана неодамна и за многу кратко време има голем број членови, а тоа денеска го потврди премиерот Оливер Спасовски кој рече дека полицијата заедно со јавното обвинителство веќе покренале истрага за да се најде администраторот и членовите на групата.
Групата за неколку дена стигна до над 7.400 членови, а во неа се пристапува по претходна покана од пријател.
Дека полицијата го откри администраторот и ги има телефонските броеви на членовите на затворената група „Јавна соба“ на социјалната мрежа „Телеграм“ на која се објавувани фотографии со експлицитна содржина, пред малку објави и МИА повикувајќи се на извори од истрагата.
Истрагата што ја води Бирото за јавна безбедност продолжува, но повеќе детали засега не се откриваат.
Претходно, МВР соопшти дека се преземаат мерки и активности за расчистување на случајот со затворената група на „Телеграм“ која споделувала фотографии и видео од девојчиња со интимна содржина.
– Веднаш по добиената пријава преземени се мерки и активности за расчитување на случајот. Секторот за компјутерски криминал и форензика веднаш контактира со мрежата „Телеграм“, со цел добивање на потребните податоци околу функционирањето на оваа група и воедно го известивме за содржинте што се објавени – информира за МИА портпаролот на МВР Тони Ангеловски.
Тој додаде дека е известено и Јавното обвинителство и дека се преземаат мерки за расчистување, а воедно апелира до граѓаните да пријават во полицијата злоупотреба на фотографии не само за овој, туку и за кој било друг случај.
Реакции за групата имаше вчера по социјалните мрежи. Според споделените информации на социјалните мрежи дел од фотографиите објавени во оваа затворена група се преземени од отворени профили, а дел биле препраќани преку приватни профили и имале порнографска соддржина.
Групата, како што изјави премиерот Оливер Спасовски, е креирана за многу брзо и за многу кратко време има толкав број учесници.
– Според информации што ги добив од Бирото за јавна безбедност покрената е целосна постапка за расчистување на овој случај, известено е јавното обвинителство и заедно се работи на откривање на администраторот, меѓутоа и на членовите на оваа група, изјави Спасовски во одговор на новинарско прашање на денешната прес-конфренција во Владата.
Тој апелира да се заврши што е можно побрзо активноста околу завршување на сите процедури во делот на истрагата и на одговорните што ќе се утврдат да сносат целосна одговорност.
– Ова е апел до сите нас, апел е и до родителите, апел и до образовните институции да имаме надзор над своите деца и да реагираме благовремено и семејствата, но и образовните институции се со цел заеднички да придонесме да не се случуваат вакви случаи. Имало секако вакви случаи и претходно на кои сме работеле заеднички со Министерството за труд и социјална политика и биле расчистувани навремено, меѓутоа сето ова треба да покажува дека не само репресивниот елемент во откривањето на вакви состојби, туку и многу порано да се работи превентивно и сите заедно да работиме и во семејствата и во институциите – посочи Спасовски.
Дополнителниот заменик-министер за труд и социјална политика Санела Шкирељ истакна дека се работи координирано со Министерството за внатрешни работи и со Министерството за образование и дека во моментов немаат пријава од родители, но апелираше до сите родители кои имаат информација дека нивните деца биле изложени и биле дел од оваа група да се обратат до центарите за социјални раобти.
– Информацијата ја добивме синоќа и ведаш со Минстерството за внатрешни работи и МОН се искоординиравме. МВР постапува во делот на истрагата. Јас синоќа упатив апел и сега аплеирам до сите родители чии што девојчиња биле изложени на таква содржина во таа група да се обратат до центарите за социјални работи, каде нашите тимови стојат на располагање за психолошка помош, поддршка и советување – рече Шкриељ.
Според неа, доколку се утврди дека и креторите на гурпата се малолетници Центаорт за социјални работи во сорабокта со МВР ќе постапува во рамки на своите надлежности, а со МОН, како што додаде, ќе постапуваат преку своите стручни тимови што ги имаат во училиштата.
