Ветото на Франција за почеток на преговорите за пристап со Северна Македонија и Албанија не значеше „не“, туку дека треба да се почека, изјави францускиот амбасадор во Австрија Франсоа Сен Пол, додавајќи дека Париз не е сам во тој став.
Говорејќи пред новинарите во Здружението на новинари на Европа (АЕЈ) во Виена, Сен Пол објасни дека Франција го сторила тоа затоа што смета дека проширувањето во сегашната форма е стратешка грешка.
– Потребно е прво да се промени методологијата на проширување за да се продолжи – рече амбасадорот.
Европската комисија, посочи, веќе подготвува предлози што ќе бидат презентирани наскоро.
– Се надеваме дека ова ќе доведе до проширување – рече Сен Пол, додавајќи дека Албанија и Северна Македонија би можеле лесно да влезат во ЕУ.
Сен Пол, кој беше амбасадор во Хрватска пред неговото пристигнување во Виена, исто така кажа дека ЕУ не ги поддржува доволно земјите по пристапувањето во Унијата.
Тој објасни дека пристапувањето се смета за крај на патот и нема дополнителна поддршка за реформите што не можат да се надминат само со фондот за кохезија.
– Истиот метод беше применет и за Источна Европа кога станува збор за Шпанија или Австрија – рече амбасадорот, истакнувајќи дека не се земени предвид посебните потреби и историската позадина.
Во овој контекст, тој повика на поголема соработка во ЕУ.
– Секако, имаме различни ставови, но денешниот баланс не е најефикасен. Европа не може да ги избира предизвиците. Тоа не е а ла карт, туку едно мени – објасни Сен Пол.
Тој, исто така, се осврна на проблемот со миграцијата и истакна дека ЕУ не може да се концентрира исклучиво на Фронтекс и повика на стабилизација на земјите на потекло и транзит.
– Мигрантската криза од 2015 година беше изненадување само за оние кои сакаа да бидат изненадени. Европејците требаше да соработуваат повеќе. Треба да ги браниме нашите вредности, интереси и работни места, затоа што имаме добар напредок овде – објасни Франсоа Сен Пол.
