Специјална полициска опрема за случаи на нарушен јавен ред и и мир во поголем обем доби денеска Посебната единица за поддршка (ПЕП), првпат од нејзиното постоење.
Опремата е дел од финансиската донација на Владата на Чешка за потребите на МВР.
МВР информира дека станува збор за опрема од заштитен карактер, која се користи за време на насилни протести и немири, а во неа влегуваат заштитни елеци, штитници за пределот на рацете и штитници за пределот на нозете, чија основна намена е заштита на полициските службеници од повреди. Воедно, покрај оваа опрема, извршена е и набавка на заштитни штитови за јавен ред и мир.
„Специјалната полициска опрема за припадниците на Посебната единица за поддршка претставува уште една активност во континуираните напори на МВР за подобрување на материјално-техничките услови за работа на сите припадници на полициските служби, што беше позиционирано меѓу највисоките приоритети за раководството на МВР во последните две и пол години, со цел реално востановување на модерно опремена и професионално подготвена полициска служба, согласно сите европски стандарди“, вели МВР.
