Во сабота во 17 часот во зградата на македонската влада ќе се сретнат лидерот на опозицијата Христијан Мицкоски и премиерот Зоран Заев, јави Алфа повикувајќи се на извори во двете најголеми македонски партии.
Според тие информации, истиот ден, но во 19.30 часот, се очекува средба на Мицкоски и со лидерот на ДУИ Али Ахмети, за што не се посочува локација. Тема на двете средби се деталите за формирањето на техничката влада.
Се очекува Заев до 3 јануари да се повлече од премиерското место и тогаш да биде избрана техничката влада што ќе има мандат до изборите на 12 април Органите на СДСМ в петок се очекува да ги донесат одлуките за тоа кој ќе биде технички премиер и за попопнување на позициите дополнителен заменик-министер со право на вето во министерствата за внатрешни работи и за труд и социјална политика.
Премиерот во заминување деновиве, сепак, ја остави подотворена вратата за одложување на изборите, доколку, како што вели, продолжи блокадата на парламентот за законите кои се од егзистенцијално значење за граѓаните.
