Министерот за внатрешни работи Оливер Спасовски потврди дека се спојуваат единицата за прв одговор „Алфа“ и единицата за јавен ред и мир во посебна интервентна единица. Тој рече дека се прави нова реорганизација во МВР, а фузијата на двете единици е по примерот на повеќе европски земји, чија крајна цел е да има поголема видливост и активност на луѓето на терен. До петок ќе се знае кој ќе раководи со новата единица.
Единицата „Алфаи“ беше формирана во 2005 година, со цел борба против уличниот криминал. Со нејзиното спојување со единицата за јавен ред и мир, „алфите“, практично, заминуваат во историјата, односно припадниците на оваа единица се очекува да бидат прераспределени на други работни места во МВР.
„Алфите“ беа полицајци во цивилка, користеа необележани возила и имаа задача да сузбиваат уличен и насилен криминал.
