Рускиот претседател Владимир Путин изјави дека ставот на неговата земја останува непроменет кога станува збор за Косово и дека смета дека основата за решавање на тоа прашање мора да биде Резолуцијата 1244 на Советот за безбедност на ООН, додавајќи дека Москва ќе го поддржи ставот на Белград за прашањето за компромис со Приштина.
Путин на прес-конференција со српскиот претседател Александар Вучиќ, по нивната средба во Сочи, рече дека во мировното решение за косовската криза мора да се почитува суверенитетот и интегритетот на Србија и соодветно да се обезбедат интересите на сите етнички групи во регионот.
– Москва е подготвена да го поддржи компромисното решение, доколку го постигнат Белград и Приштина и ние ќе го поддржиме ставот на Србија – изјави Путин.
Тој оцени дека разговорите со Вучиќ се одвивале во конструктивна атмосфера и дека биле разгледани голем број прашања.
Путин исто така рече дека Србија се вклучила во изградбата на гасоводот „Турски тек“ и дека делот што поминува низ српска територија ќе биде завршен во наредните недели.
– Разгледавме дали ќе можеме да обезбедиме зголемување на испораките во скоро време. Што се однесува до транзитот преку Турскиот тек, ние сме подготвени, а српскиот дел од бугарско-унгарската граница е речиси завршен, 90 отсто е веќе поставено и станува збор за недели – кажа Путин, додавајќи дека проектот сè уште го забавува Бугарија.
Српскиот претседател му се заблагодари на рускиот претседател за поддршката на територијалниот интегритет и суверенитет на Србија, изјавувајќи дека го информирал за тековниот дијалог со Приштина и дека наскоро не очекува било какво компромисно решение, додавајќи дека ставот на Приштина е само да „заработи признание“, а Србија да не добие ништо, што, како што кажа, нема да се случи.
Вучиќ оцени дека односите меѓу двете земји се одлични и дека Србија смета на поддршката на Русија во сите меѓународни организации, како што и Русија да смета на српската поддршка.
Вучиќ пред новинарите во Сочи по средбата со Путин изјави дека Србија не гласала за ниту еден меѓународен акт против Русија. Тој додаде дека луѓето во Србија повеќе „го ценат Путин од некои поранешни руски лидери“.
Вучиќ изјави дека Србија „немаше да биде бомбардирана во 1999 година, доколку Путин во тоа време беше на власт во Русија“.
