Како основен критериум и компас во надворешната политика, Грција секогаш го има меѓународното право, а еден меѓународен договор како што е Договорот од Преспа, иако предупредувавме дека е штетен, сепак беше ратификуван и дава резултати, изјави портпаролот на грчката Влада Стелиос Пецас на денешниот редовен брифинг со новинарите, во однос на ставот на поранешниот премиер на Грција од редовите на Нова демократија, Андонис Самарас.
Како што јави дописничката на МИА од Атина, Пецас рече дека позициите на Самарас се познати и истакна дека Нова демократија (НД) „уште од прв момент го изрази нејзиното противење за Договорот од Преспа”.
– (НД) направи сѐ што можеше за да не се потпише, вклучувајќи и предлог за гласање недоверба на Владата, направи сѐ што можеше да не се ратификува и секогаш предупредуваше дека од моментот кога ќе се ратификува, произведува резултати од кои Грција не може да се ослободи. Грција е земја, како што реков и претходно во однос на темите што се однесуваат на грчко-турските односи, што секогаш како основен критериум и компас во надворешната политика го има меѓународното право. Според тоа, еден меѓународен договор како што е Договорот од Преспа, иако предупредувавме дека е штетен договор, беше ратификуван и дава резултати – рече Пецас.
