Просветниот инспектор за високо образование, Ѓорѓи Илиевски, кој пред неколку месеци откри дека министерот за образование и наука Арбер Адеми незаконски е избран во наставно-научно звање доцент на Правниот факултет на Државниот универзитет во Тетово во 2017 година, додека сѐ уште бил министер без ресор нема да се откаже од тешката битка за правда, откако денеска Собраниската Aнкетна комисија за човекови права се прогласи за ненадлежна да одлучува за неговиот случај.
Илиевски неодамна до собраниската комисија, чии членови се декларираат дека ќе стојат во одбрана на правата на граѓаните поднесе преставка во која се пожали на мобинг на работното место, откако го обелодени скандалот со незаконските унапредувања во образованието.
Тој надевајќи се дека ќе добие заштита од пратениците, јавно го образложуваше својот случај пред анкетната комисија на почетокот на ноември, но комисијата донесе заклучок дека Илиевски треба да бара судска заштита за мобингот.
Откако почна голготата на просветниот инспектор, тој вели дека случајот го пријавил и во Хелсиншкиот комитет и кај Народниот правобранител, а по препорака на ОБСЕ се обратил во собраниската Анкетна комисија за човекови права.
– Одлуката да се прогласи за ненадлежна за мобингот за кој по нивно барање доставив и дополнителни докази и материјали е голем минус за Анкетната комисија од која очекував да го осудат мобингот и да застанат во одбрана на укажувачите кога пријавуваат незаконско работење. Јас сум свесен дека Анкетната комисија не е суд и оттаму за мојот случај поднесов кривична пријава до Основното јавно обвинителство против Државниот инспекторат и неговиот директор Томе Спировски, но сепак очекував да искажат осуда на мобингот, а тие не ме ни поканија да ми образложат што одлучиле по мојата преставка. Утрово телефонски ме информираа за одлуката и ме известија дека писмениот одговор можам да го подигнам во архивата на Собранието – вели инспекторот Илиевски за Плусинфо.
Илиевски, освен скандалот со министерот Адеми, откри и дека уште двајца актуелни државни функционери исто така незаконски напредувале на Правниот факултет при ДУТ.
Инспекторот тврдеше дека законот го прекршиле заменик-министерот за внатрешни работи Агим Нухиу како и директорот на Државниот завод за индустриска сопственост, Сафет Емрули.
Против инспекторот Илиевски беше покрената дисциплинска постапка затоа што ги обелодени незаконските унапредувања на тројцата државни функционери.
