Кој ќе ја утврди одговорноста за вандализмот на навивачката група Шверцери во МНТ при прославата на јубилејот, премиерот Зоран Заев, владата или нова комисија засега е нејасно, бидејќи како што дознава Плусинфо, во записникот на работната група никаде не се посочува кој е одговорен, туку само хронолошки се наведуваат случувањата од денот на прославата.
Кон записникот, според информации на Плусинфо, има и четири прилози и тоа за утврдената штета во театарот, молба за информација до фирмата одговорна за техничката поддршка за тоа кој го организира вториот настан, и две вибер комуникации помеѓу директорката на МНТ Симона Угриновска и пратеникот на ДУИ Артан Груби.
Премиерот Заев вчера од собраниска говорница кажа дека проценетата штета од прославата на Шверцерите во МНТ е 3.965 евра и рече дека е направен записник од работната група за утврдување на одговорноста, но дека не успеал да го види. Заев додаде дека кога ќе се утврди одговорноста, ќе се плати и штетата.
– Националниот театар е отворен за сите и сите треба да го користат, но се знае под какви услови. Од тоа треба да произлезе и одговорноста што ќе биде објавено кога ќе се утврди – рече Заев.
Тој повтори дека во МНТ имало два настана и дека владата е организатор само на првиот настан, односно за Денот на албанската азбука, а за тоа има и договор помеѓу владата и МНТ.
Од владата и денеска повторуваат дека Министерството за политички систем е организатор на првиот настан и тоа од 19 до 21 часот. Тоа било уредно пријавено и во полиција, противпожарна и во итна помош. За прославата на јубилејот на Шверцерите, велат владата не е одговорна бидејќи и не го организирала.
Од веќе објавените информации од директорката на МНТ Угриновска, како организатор на јубилејот на Шверцерите е посочен пратеникот Груби.
Таа за дел медиуми веќе изјави дека не била информирана за прославата на Шверцерите.
– Се работеше за два настана во организација на Владата и никој не очекуваше вакво нешто. Првиот дел помина во најдобар ред, свечена академија и одбележување на Денот на албанската азбука, а потоа започна вториот, за кој пратеникот Артан Груби беше координатор и ме извести дека се работи за проекција на документарен филм – изјави тогаш Угриновска.
Според информации на Плусинфо, за ова нема пишан документ. Во записникот на работната група е наведена хронологијата на случувањата на двете прослави. И додека за првиот настан има документ дека организатор е владата, за вториот нема договор со организатор. Оттука е нејасно дали врз основа на вибер комуникацијата на директорката и пратеникот, Заев, владата или нова комисија ќе пресечат дека Груби е организатор и тој ќе треба да ја плати штетата од речиси 4.000 евра на МНТ или ќе нема организатор и со тоа ќе нема кој да плати.
Груби веќе се огради дека тој е организатор, а за вандализмот на Шверцерите рече дека е прослава на навивачи каде што се очекува скандирање и пеење. Во одбрана на Шверцерите застанаа и лидерот на ДУИ Али Ахмети и вицепремиерот Бујар Османи.
