Ракометарите на Вардар в сабота се домаќини на Кјелце во седмото коло од Лигата на шампионите. Капитенот на „црвено-црните“ Стојанче Стоилов најави голема борба со стариот ривал.
Тој зборуваше и за тоа што ќе игра против својот добар пријател и доскорашен клубски колега, Игор Карачиќ велејќи дека играл многу пати против него со репрезентацијата, но дека ова е поинако.
Некој ќе плаче на крај, рече Стоилов, а се надевам дека тоа ќе биде токму тој.
– Не очекува тежок натпревар против секогаш незгодниот Кјелце. Со нив играме секогаш интересни натпревари. Тие се наш голем ривал и сите сакаме да победиме. Се надеваме на поддршка од трибините. Ситуацијата не е лесна за нас. Имаме многу повредени играчи и многу кои штотуку закрепнаа од повреда. Мислам дека во моментов не знаеме на што сме. Наше е да дадеме сѐ од себе како на сите останати натпревари и да се обидеме да победиме – изјави Стоилов на денешната прес-конференција.
Тренерот Едуард Кокшаров кажа дека се уште нема јасна слика како ќе изгледа тимот.
– Во овој момент не можам ништо да кажам за тоа со кои играчи ќе располагам. Кој ќе игра , а кој не ќе се знае утре, на ден пред натпреварот. Не е лесно, но убеден сум дека оние кои ќе играат ќе дадат максимум. Самиот натпревар ќе покаже што и како – рече Кокшаров.
Натпреварот ќе се игра в сабота од 17.30 часот во СЦ „Јане Сандански“.
