Контроверзниот француски деликатес „foie gras“, паштета направена од црн дроб на гуска или патка, наскоро би можел да биде забранет во Њујорк поради начинот на кој се произведува, односно поради бруталноста врз животните.
Поголемиот број членови на Градскиот совет потпишале согласност за воведување на закони со кои би се стопирала продажбата на оваа луксузна паштета. Тоа значи дека рестораните, супермаркетите и продавниците целосно ќе останат без деликатесот.
Одлуката ја поддржуваат здруженијата за заштита на животните и критичарите кои сметаат дека методите на производство се сурови.
Процесот на производство вклучува насилно хранење на птиците така што во грлото им се набива цевка, товејќи го црниот дроб.
Кој било ресторан кој ќе биде фатен дека го продава овој производ, ќе биде казнет со 1.000 долари или дури една година затвор.
Компаниите сепак предупредуваат дека забраната би можела да има многу негативни влијанија, и фармите ќе бидат финансиски оштетени, како и дека многу луѓе ќе останат без работа.
Законот го поддржал и градоначалникот на Њујорк, Бил де Бласио откако било договорено дека ќе настапи тригодишен постапен период во кој на претприемачите ќе им биде овозможено да се прилагодат.
Инаку, овој закон е само дел од актите кои се „animal friendly“, претставени во овој град. Еден од актите се однесува на коњите и забраната тие да работат доколку температурите се над 32 Целзиусови степени. Исто така, во Њујорк е забранета продажба, лов и држење на гулаби.
Оваа паштета е веќе забранета во Чикаго и Калифорнија.
