Премиерот Зоран Заев по денешното сведочење рече дека во однос на прислушувањето поранешниот премиер Никола Груевски бил злото, но не го амнестираше ниту Сашо Мијалков кого ниту еднаш со име и со презиме не го спомена во судница. Со самото тоа што зборувал за УБК, според него, се посочува на вина на Мијалков. Заев зборуваше и за бавните судски процеси и рече дека му е криво кога гледа дека предмети се враќаат на почеток на судењето.
– Како што треба време за економски резултати, така треба и за правдата. Добро е што досега се постигнати резултати. Чавков и други се осудени со неправосилни пресуди за 27 април, осудена со правосилна е Гордана Јанкулоска, осуден е Сашо Мијалков. Дел од тие предмети се пред првостепениот, други пред второстепени судски инстанци. Се надевам дека Никола Груевски ќе се врати да си ја одлежи казната. И мене ми е криво кога гледам дека предмет се враќа повторно на почеток од разни причини. Чувствувам и јад, горчина, тоа не е во ред, може да се игра топло-ладно, но народот наш очекува правда, со конечни пресуди да бидат затворени случаите затоа што секоја пресуда испраќа порака да не се повтори никогаш – изјави Заев по денешното сведочење.
