Македонија денеска и утре ќе биде домаќин на Првиот дигитален самит на земјите од Западен Балкан, кој е првиот од серијата настани од овој тип што ќе бидат организирани на годишно ниво.
Самитот е дел од Берлинскиот процес и претставува можност за приближување на земјите од Западен Балкан кон ЕУ, но ќе бидат презентирани и конкретни начини како да се добијат подобри дигитални услуги, како ИТ фирмите да се поврзат подобро и како младите да добијат квалитетни дигитални вештини.
Најавено е присуство на премиери, владини претставници, бизнисмени, регионални организации и на академската заедница кои ќе разменат идеи и предлози за заедничко делување. Ќе се разговара за намалување на цените на роамингот, сајбер безбедноста, зголемување на дигиталните вештини на граѓаните и меѓусебно дигитално поврзување на земјите од регионот. Се очекува да произлезе и заедничка иницијатива за меѓусебно признавање на дигиталните сертификати.
Паралелно со дводневниот Самит ќе се одржи и Експо саем на ИТ фирми на кој компаниите од дигититалната сфера ќе ја презентираат својата работа, а ќе биде организиран и Камп за старт ап компании, како и конференција посветена на лажните вести.
Надвор од организацијата на Самитот најавено е дека ќе се одржи и вечера на која ќе присуствува високата претставничка за надворешна и безбедносна политика на ЕУ, Федерика Могерини со премиерите од земјите од Западен Балкан кои ќе учествуваат на Самитот.
За организација на Самитот ќе бидат потрошени 245 илјади евра, а за време на неговото одржување ќе има посебен сообраќаен режим на сообраќајниците околу хотелот „Александар Палас“ и Спортскиот центар „Борис Трајковски“. Ќе бидат затворени и пренасочени за сообраќај улиците „Јадранска магистрала“, „Скупи“, делови од булеварите „Осми Септември“, „Илинден“, како и другите сервисни улици кои гравитираат кон двата објекта. Посебен сообраќаен режим е предвиден и за обиколницата на автопатот до Скопскиот аеродром.
