Осомничената обвинителка Катица Јанева не напишала писмо со кое барала да биде активирана оставката што ја најави на 15 јули, дознаваме од извори од затворот во Шуто Оризари каде што ја издржува мерката притвор поради сомнение дека е инволвирана во аферата „Рекет“.
Претходно и од кабинетот на собранискиот претседател Талат Џафери ни одговорија дека до Собранието, каде што вчера почна процедурата за нејзино разрешување, нема добиено писмо со оставка на обвинителката во притвор.
За Плусинфо и претседателот на Советот на обвинители Ацо Колевски изјави дека не добиле допис со оставка од Јанева, а и да се случи тоа, според Законот за СЈО, тој документ обвинителите може да го разгледаат, а ќе го утврдат откако за тоа одлука ќе донесат пратениците.
Инаку, вчера Комисијата за избори и именувања едногласно и без дебата, му препорача на Собранието да ја разреши Јанева поради незаконско, несовесно и нестручно раководење со СЈО.
