Да, до скоро не ни знаев да ја изговорам болеста од која се разболев, можеби така е и подобро за мене, но, еве, по 2 трансплантации на матични клетки, живеам и бијам битка со миеломот, раскажа денеска Трајче Пендаровски, 58-годишен скопјанец, кој заедно со лекарите и пациентите од Клиниката за хематологија, министерот Филипче и директорите на Фондот за здравство, присуствуваше на настанот посветен на малигни хематолошки заболувања.
Кога пред околу 3 години Трајче почнал да го боли ‘рбетот и да му трпнат прстите на рацете, отишол на рутински преглед. Но…
– Ни на крај на памет не ми беше дека, прегледувајќи го ‘рбетот ќе ми биде откриена една од најтешките болести на крвта, миеломот. Но кога по снимката на ‘рбетниот столб, направив и крвна слика, а сите вредности беа двојно намалени, што веднаш им алармираше на лекарите дека станува збор за некое заболување на крвта. За среќа, се паднав во добри раце – на Клиниката за хематологија има многу солидни и стручни лекари и медицински персонал, па веднаш почна и лекувањето… Успешно беше и пресадувањето на матични клетки, а ми земаа од моите и еве, да чукнам во дрво, се справувам со болеста. Знам дека ќе ја имам до крајот на животот, но здравје Боже, да разговараме за ова и на мои 80, 90 години – вели и малку низ смеа Трајче.
Трајче Пендаровски
Но на овој скопјанец не му е до смеење кога ќе му се јават нус-појави од лековите што ги прима за миеломот.
– Ме болат нозете зашто добив периферна невропатија, односно имам трајно оштетување на нервите, а се мачам и со столицата, бидејќи се случува и по една недела да не можам да ги испразнам цревата, што исто така ми предизвикува болка. Знам дека е ова тешка болест и дека лековите се силни, а гледам дека сега има и многу посовремени терапии за разлика од пред две-три години. Но се надеваме, ние пациентите, дека наскоро со новите лекови чија набавка е во тек, ќе ни бидат достапни уште понови лекови со кои ќе имаме и помали несакани дејства. За помалку да се мачиме – порачува Пендаровски, кој е член на Здружението „Борка“ каде се дружи со останатите членови, со кои заедно се грижи и тие, но и другите болни од рак „со секој нов ден“ да имаат се подобри услови за лекување.
