Поради основано сомнение дека сторил кривично дело „злоупотреба на службената положба и овластување“, поранешниот граданочалник на Прилеп, Марјан Ристески, заработи нова кривична пријава. Осомничен е дека наместил тендер за зимско одржување на улици и патишта во вредност од околу 1,2 милиони евра.
Ќе одговара и правното лице „Пела транс“ ДООЕЛ, од село Мажучиште, прилепско, за кривичното дело „злоупотреба на постапката за јавен повик, доделување на договор за јавнa набавкa или јавно-приватно партнерство“.
МВР тврди дека Ристески, во својство на градоначалник на општина Прилеп, на пријавеното правно лице му овозможил да се стекне со противправна имотна корист од 77.031.890 денари, средства од буџетот на општината. Градоначалникот создал услови „Пела транс“ да биде единствен понудувач и избрана фирма за најповолен понудувач на постапката за јавна набавка за зимско одржување на улици и патишта на територијата на општината Прилеп.
Пријавената фирма не можела да учествува во постапките за јавни набавки поради неплатени обврски за даноци.
