Мислам дека ако не излезеше написот на Героски, никогаш, ама баш никогаш немаше да биде уапсен Боки, никогаш немаше да биде откриена аферата „Рекет“ и мислам дека некој сакал тоа фино да го заташка. Поради тоа што почна да се зборува во јавноста, заради тоа почна и да се прави истрага и да се апси Бојан Јовановски. Имам впечаток дека некој навистина сакал тоа да го сокрие.
Вака изјави Снежана Лупевска, уредничка на Телма и емисијата „Код“, во телефонското гостување во емисијата „Стадион“ на Канал 77.
– Зошто, ако се следи каде се одлеале парите, еден милион евра од Орце Камчев и каде се одлеале и другите пари кои што уплаќале во невладината „Меѓународен Сојуз“-дали во чантите на Боки или скапата облека, или некој друг е крајниот консумент на тие пари, односно се испорачани на друго место, за што постојат разни шпекулации, тогаш навистина ќе се знае поголемата слика за случајот „Рекет“ – додаде Лупевска.
Таа рече дека целата истражна постапка, ако се има во предвид времето кога се направени снимките, нивното праќање во Обвинителството и тоа кога Јовановски беше уапсен, според неа, оди многу бавно.
ФОТО: Фејсбук
