Француската асоцијација Робин де Боа соопшти денеска дека поднела тужба до парискиот суд поради намерно загрозување на човечки животи од испарување на олово во пожарот кој ја зафати катедралата Нотр Дам.
Според оваа Асоцијација, локалните власти требале веднаш да изречат заштитни мерки. Во тужбата не се посочува кој е конкретно осомничен.
Стотици тони олово се истопија кога во пожарот во април беа уништени покривот и кулата на катедралата Нотр Дам, а исклучително високо ниво на олово е регистрирано во воздухот во околината на црквата. Децата се посебно чувствителни на здравствени проблеми предизвикани од труење со олово.
Градските власти минатата недела наредија длабинско чистење на училиштата во соседството, а здравствените власти им препорачаа на децата и на бремените жени кои живеат во близина на катедралата да направат тестирање на крвта.
