Претседателот на ЗНМ Младен Чадиковски и директорот Драган Секуловски денеска во Собранието се сретнале со пратеникот Илија Димовски кој е претседател на собраниската Комисија за избори и именувања каде разговарале за блокираниот процес за избор на членовите на Советот на Агенцијата за аудио и аудио визуелни медиумски услуги и на Програмскиот совет на МРТ.
„Беше договорено дека во наредните денови, Димовски ќе ја закаже седницата на оваа Комисија со што ќе се отпочне постапката за избори на лицата во овие совети како предуслов за реформи во медиумскиот регулатор и јавниот сервис. Според Димовски, се очекува дека веднаш после летните одмори, доколку има политички консензус, ќе се премине кон законската обврска и ќе се организира јавна дебата за кандидатите кои ги исполнуваат законските услови за да бидат избрани во двата совета со дво третинско мнозинство од страна на Собранието“, соопштија од ЗНМ.
Од страна на Здружението му потенирале на Димовски дека за оваа постапка веќе сите рокови се пробиени и дека по закажувањето на седницата политичките партии треба да покажат високо ниво на разбирање за да се одблокираат медиумските реформи.
„Освен ова, на средбата беше посочен и проблемот за нефункциоирањето на Комисија за заштита на правото за слободен пристап до информации од јавен карактер која веќе повеќе од една година нема кворум да одлучува по претставки од страна на новинарите и граѓаните. Оваа Комисија, сега веќе Агенција со измените на законот од мај 2019 година е од исклучително значење за подобрување на транспарентноста на јавните институции за тоа како тие работат и како ги трошат парите на граѓаните. Од претставниците на ЗНМ беше побарано веднаш да се ангажира Комисијата за избор и именување при Собрание и да го спроведе законот со избор на новиот директор и заменик директор во оваа Агенција“, додаваат на ЗНМ.
