Речиси 100 вработени во телевизијата 1, чиј неформален сопственик Бојан Јовановски алијас Боки 13, е во притвор, од понеделникот наваму секојдневно стравуваат за својата иднина професионална и егзистенцијална, пишува Дојче веле.
Засега телевизијата продолжува да работи нормално, вели една новинарка која сакала да остане анонимна. Сите колеги и натаму доаѓаат на работа и си ги извршуваат дневните задачи, но стравот за иднината за куќата се чувствува на секој чекор.
Заминување од 1ТВ засега најавил само еден новинар-уредник. Во телевизијата веќе неколку недели ги нема уредниците кои работеле на проекти со хонорарни договори. Меѓу нив и, сега веќе, поранешниот главен и одговорен уредник Ацо Кабранов. Тој не е оптимист за иднината на 1ТВ по скандалот „Рекет“ во кој првоосомничен е сопственикот Бојан Јовановски.
– Песимист сум дека 1ТВ може да продолжи со работа. Жал ми е за 70-на новинари, камермани и друг технички кадар кој вредно и чесно си ја вршеше работата, а сега ќе мора да се соочат со реалноста, да си бараат друга работа за егзистенција. И да не се случеше ова веќе се подготвував од здравствени причини да се повлечам. Но да бидам искрен, скандалот, иако телевизијата со ништо не е инволвирана во тоа, ми ја прелеа чашата и ми ја зацврсти одлуката дека требе да си заминам, да си бидам пензионер и да си го чувам здравјето – вели Кабранов, кој признава дека скандалот само ја забрзал неговата одлука за повлекување.
