Советот на Општина Охрид го осуди вчерашниот инцидент меѓу советниците и смета дека тоа не им доликува на избрани претставници на граѓаните.
„Советниците се гласот на граѓаните, а Советот највисок претставнички орган кој треба и мора да работи во интерес на граѓаните и решавање на нивните потреби.
Сметаме дека ваквото однесување е изолиран инцидент и нема да се повтори во иднина и ги повикуваме советниците да се однесуваат во духот на демократијата и почитување на различните мислења“, се наведува во реакцијата на Советот на Општина Охрид.
БЕСА вчера соопшти дека советник на ДУИ физички нападнал советник на БЕСА во Охрид.
„На многу срамно и екстремно ниско ниво, советникот од БЕСА во општина Охрид, Џемал Мена, беше физички нападнат од советник на ДУИ“, соопшти партијата.
Движењето БЕСА го осуди нападот и врз советникот кој ги бранел „правата на охридските Албанци“, а бил нападнат токму за време на седницата на општинскиот совет на Охрид.
Случајот е пријавен во полиција.
