Агенцијата за туризам ќе направи подготовка за ново, современо претставување на земјата во странство, според уставните одредби и Договорот од Преспа, велат од Владата на прашање на Плусинфо дали се планира да се изршат корекции на официјалниот сајт за туристичка промоција на земјава Macedonia timeless и промена на името и кога ќе се случи тоа, откако во грчките медиуми беа пренесени реакции на опозициската Нова демократија дека на оваа веб страница нашата држава се промовира под името Македонија.
Партијата на Мицотакис, упати остри критики во кои оцени дека станува збор за провокативна и дрска употреба на терминот Македонија на официјален сајт за туристичка промоција на нашата земја.
Од македонската Влада за Плусинфо велат дека измените на јавните комуникации согласно Договорот од Преспа и согласно употребата на новото уставно име, се вршат постојано, почнувајќи од првиот ден од стапување на сила на Договорот.
– Преостануваат активности коишто треба да бидат реализирани и во иднина, коишто ќе вклучат корекции на јавните комуникации поврзани со споменатата веб страна. Агенцијата за туризам во периодот којшто претстои ќе направи подготовка за ново, современо претставување на земјата во странство, коешто ќе ги следи уставните одредби и Договорот од Преспа – велат од Владата.
По реакцијата на Нова демократија, се огласија и од кабинетот на Јоргос Катругалос, министерот за надворешни работи на Грција, со забелешка дека партијата на Мицотакис ги игнорира фактите за да добие ситни политички поени.
– Нова демократија уште еднаш одбра да биде опашка на жолтиот печат што ја поддржува нејзината политика. Од очигледни причини за ситнополитичка употреба, одбира да го игнорира фактот дека целиот свет, соседната земја ја нарекува Северна Македонија, дека промени стотици имиња на институции и објекти за да одговараат на новото име и продолжува со тоа, и дека веќе од 15-ти мај е соопштено дека ќе ја промени туристичката кампања за да се усогласи со новото име – велат од кабинетот на Катругалос.
