ПериМак е дел од фондацијата на проектот ХОУП и Штарштундер од Германија, а целта е зајакнување на капацитетите на родилиштата.
– Се донираше многу значајна и вредна опрема, вкупната вредност надмина некаде околу милион и двесте илјади евра, и тоа што е најзначајно од сѐ е што денеска дефинитивно се пушта во функција и електронското мониторирање на ЦТГ кај жени кои чекаат породување, што значи дека од едно централно место ќе може да се мониторираат, и тој електронски систем да алармира и при најмала промена – рече министерот.
Тој додаде дека овој проект значеше и тренинг и пренесување на знаењата и вештините на лекарите и на медицинските сестри.
– Од опрема се донираа кревети, специјална форма на вентилатори за интензивна помош кај бебето за да се одржи добриот капацитет на дишење по раѓањето. Донирани се и специјални ламби за осветлување доколку бебето има жолтица, специјални блендери што го мешаат кислородот со воздухот и тоа е една придобивка на технологијата последните години – додаде Филипче.
Ќе следи опремувањето на родилиштата во Тетово и во Куманово, а со буџетски средства комбинирано и останатите големи родилишта, во Струга, Струмица и родилиштето во Штипската болница, односно на сите места каде што се одвиваат најголем број раѓања во нашата земја.
Тренираните лекари и сестри кои што беа на едукација во странство сега го пренесуваат знаењето на своите колеги за користење на оваа опрема.
