Во кинескиот Национален природен резерват Волонг е снимена потполно албино панда, објавија од резерватот.
Фотографијата е снимена со инфрацрвена камера во април, околу 2.000 метри над нивото на морето во југозападната кинеска покраина Сичуан. Ретката панда е снимена додека талкала низ една шума со бамбуси, пренесува ССТВ.
– Судејќи по спимките, пандата е албино и е стара помеѓу една и две години – рекол Ли Шенг, истражувач од Универзитетот во Пекинг и стручњак за мечки.
Тој подоцна за Си-ен-ен открил и дека ова е првпат ваква панда да е снимена во дивина.
– Ова целосно бела панда е реткост меѓу дивите панди. Ова покажува дека гените на албинизмот постојат во дивата популација на големите панди во Волонг – додал и заклучил:
„Пандата изгледа силно и чекори стабилно, што е знак дека генетската мутација можеби и не го отежнала премногу животот на ова животно.“
Резерватот сега планира да постави уште камери за да го следи развојот на оваа панда и интеракцијата со другите панди.
