Сите активности од посетата на папата Франциск на земјава денеска во живо, како и со текст и фотографии ги пренесува Ватикан њуз, официјалната медија мрежа на Светата столица.
Информациите се објавуваат и на македонски јазик, а преносот оди и на Јутјуб каналот на Ватикан њуз.
Посетата на папата предизвика голем интерес и кај многу странски медиуми.
Над 300 новинарски екипи се акредитирани да ја следат посетата на папата Франциск и за нив е обезбеден медија центар со тв студио, како и простор за известување на сите активности на Папата.
Странските новинари сметаат дека ова е историска посета на папата Франциск на Скопје.
За Ен Харис од Новинската организација КРАКС во Рим, која првпат е во нашата земја, и заедно со папата Франциск пристигна во земјата со неговиот авион, ова е очигледно историска посета не само од перспектива на Ватикан, туку има и политички предзнак во врска со случајот.
– Ова е прва посета на папата Франциск на вашата земја. Во време на изборите и неодамнешната промена на името, со што се разрешија некои конфликти. Остануваат уште некои прашања што треба да бидат решени – вели новинарката Харис.
Во однос на атмосферата во центарот нагласува дека во секој прес центар, каде и да оди во светот, за ваква значајна посета, има лудост.
-За нас многу се важни лицата за врски, ни покажуваат каде е кафето, каде има интернет и со тоа ние сме задоволи – вели Харис.
Новинарката Софија Пападопулу од атинската АНА-МПА смета дека посетата на папата Франциск е во време кога Северна Македонија се движи по патот на европската интеграција.
Досегашната порака, вели таа, е важна бидејќи мултиетничкиот и мултирелигискиот карактер на земјата може да биде модел за другите места во регионот и во исто време.
– Доаѓа по Преспанскиот договор и по решавањето на проблемот со Грција и Северна Македонија и тука има порака – оцени новинарката од Атина.
Според неа, очекуван е огромен меѓународен интерес на медиумите кога е во прашање посета на папата.
– Добро е што во земја каде има само еден процент католици, има големо покривање од медиумите – вели Пападопулу.
За Фани Кариси, од порталот grtimes од Солун, ова е историска посета не само за Северна Македонија, туку и за целиот Балкан.
– Многу е интересно, од политичка гледна точка, за нашите две земји, кои имаат многу подобри односи од изминатите години. Се надевам дека Северна Македонија ќе има подобри резултати во економијата – рече Кариси.
Оваа посета има регионално значење, оцени Ивана Секуларац од Ројтерс Балкан.
– Посетата на папата Франциск е многу важна за Северна Македонија, бидејќи може да се каже дека е втор човек во светот по значење, по Трамп, и во таа смисла е историска. Доаѓа во момент кога Македонија воспостави добри односи со соседите, ги поправи односите со Грција и со Бугарија, со добри односи со соседите од поранешна Југославија. Оваа посета на некој начин е рефлектирање на стотина – изјавува таа.
Оваа слика од Скопје, истакна, ќе ја види целиот свет и целиот свет ќе слушне за Скопје.
– Папата во Скопје не зборува само за улогата на Северна Македонија, туку и за улогата на сите шест земји од Западен Балкан. Во таа смисла, оваа посета има регионална важност – изјави колешката од Ројтерс Балкан.
Во прес-центарот, за новинартите, истакна, најважен е интернетот, што тука одлично функционира и колегите од ТВ имаа добар сигнал. Има многу кафе и вода. Целосно сме задоволни, изјави Ивана Секуларац.
