Белгискиот федерален парламент денеска го одобри пристапниот протокол на Северна Македонија во НАТО, јави дописничката на МИА од Брисел.
Информацијата ја соопшти белгискиот министер за надворешни работи, Дидие Рејндерс на Твитер.
-Задоволство ми е да соопштам дека белгискиот парламент денеска го одобри законот со кој се прифаќа пристапниот протокол на Република Северна Македонија во НАТО, Белгија е на чекор да го финализира процесот на ратификација – напиша Рејндерс.
Предлог законот за пристапувањето на Северна Македонија во Алијансата беше одобрен од страна на белгиската влада пред помалку од две недели.
Белгиската процедура предвидува прво законот да добие зелено светло од Државниот совет, чие мислење иако не е обврзувачко е многу важно, потоа законот да го одобри Парламентот пред да биде ратификуван. Другите регионални парламенти не се инволвирани во процесот, само федералниот, што значително ја забрзува процедурата.
