Министерот за транспорт и врски Горан Сугарески и директорот на Јавното претпријатие за државни патишта Зоран Китанов денеска извршија увид во градежните активности кои се вршат на автопатската делница Неготино – Демир Капија. Вредноста на овој проект е пет милиони евра.
– Како што информираше надзорот, се завршуваат работите од десната лента. Така што во наредниот период очекуваме од другата страна на коловозната лента градежната компанија да ја постави градежната опрема, се со цел да се отпочне тој дел на работата – рече министерот Сугарески .
Со оваа автопатска делница Неготино – Демир Капија комплетно ќе се заврши Коридорот 10, бидејќи во изминатиот период беа комплетно реконструирани двата правца од Куманово-Миладиновце, исто така коловозната лента беше комплетно санирана во делот Велес -Градско.
Наредниот месец ќе биде пуштен во употреба автопатот Демир Капија – Смоквица.
Китанов појасни дека се работи за траса долга 17 километри. Потсети дека сите кои се возеле по овој дел од автопатот знаат колку беше тој проблематичен.
– Но, ние се заземавме ова да се исправи и ќе се исправи, посебно десната страна ни оди во приоритет. Овој дел за триесетина дена треба да биде пуштен, доколку временските услови дозволат – нагласи Китанов.
Во меѓувреме, се бара сообраќајно решение да се префрлат на другата страна, за да можат да отпочнат со правецот од Демир Капија кон Неготино, таа да биде завршена до средината на јуни и да биде пуштена за од Табановце до Гевгелија да се вози по реставрирани и безбедни патишта.
Сугарески и Китанов денеска го посетија и контролниот пункт кај Неготино, каде интензивно се одвиваат обуки.
Преку опремата во пунктот засега се контролира делницата од Демир Капија кон Смоквица.
– Се работи за еден прекрасен центар кој е прв таков во Република Македонија, но нема да биде последен со цел целата работа да биде завршена и да може да биде пуштен автопатот и веќе во месец јуни од Табановце до Гевгелија да се вози по обновени и безбедни патишта – рече Китанов.
