Не 30 колку што се проценуваше, туку дури сто кубни метри отпад беа подигнати и транспортирани од приватен двор на улицата Блажо Орландиќ во населбата Лисиче, за време на петдневната акција што ја спроведе ЈП „Комунална хигиена“ – Скопје.
Целосно е отстранета дивата депонија, составена од огромно количество мешан комунален, градежен и кабаст отпад, а локацијата е комплетно исчистена.
Во расчистувањето на дивата депонија, дневно беа ангажирани по десет работници на ЈП „Комунална хигиена“ – Скопје, отпадот се подигнуваше со втоварувач, а се транспортираше со три специјални комунални возила. Акцијата се одвиваше во координација со Инспекторатот на Градот Скопје, информираа од ЈП „Комунална хигиена“ – Скопје.
Оттаму појаснуваат:
– Дејствуваме по налог на Градот, од каде треба да ја достават фактурата до овие лица. И овој случај во Лисиче бил таков што сме чистеле депонија во приватен двор по налог од инспекторатот, а не од граѓаните. Претпоставуваме дека ќе ни биде платено за услугата – собирање и носење на отпадот. Од „Комунална хигиена“ делуваме по налог од Градот Скопје или од некоја општина, а ние немаме инспекциска служба, туку само еко патрола – додаваат од ЈП „Комунална хигиена“ – Скопје.
Од Инспекторатот на Град Скопје велат:
– Сопственикот ќе ја плати целата фактура за собирање и изнесување на 100 метри кубни отпад, а за ова прекршување на Законот за јавна чистота ќе има и казна. Инспекторатот ја тера постапката, ќе следи и прекршочна пријава за овој и за сите други граѓани кои прават вакви депонии во своите дворови – изјави м-р Мирослав Богдановски, раководител на секторот Инспекторат на Град Скопје.
Се пресметува износот кој овој скопјанец ќе треба да го плати за собирање и изнесување на 100 метри кубни смет од дворот.
Се чини дека откако ќе ја добие фактурата, нема веќе да му текне ни хартивче да фрли.
