Демократски сојуз повикува на политички консензус за одржување фер, демократски и чисти претседателски услови, како гаранција за успешност на изборите.
– Партиите и коалициите кои стојат зад претседателските кандидати да преземат одговорност дека ќе опстојат во изборниот процес, во спротивно, треба да понесат политичка и друг вид на одговорност. Бојкот на изборите во вториот изборен круг ќе значи антидржавен чин со катастрофални последици за иднината на државата – соопшти партијата.
ДС бара консензус и за работата на Специјалното јавно обвинителство, кое според нив, треба да продолжи со целосен капацитет, а прислушуваните разговори и натаму треба да бидат доказ во постапките, во спротивно, Врховниот суд, со право ќе ги изземе од доказите и во предметите во кои досега се користени.
– Концептот за реформи во тајните служби треба да се заокружи со коренити организациски и кадровски промени во разузнавачките и контраразузнавачките служби. Мора да се изгради систем за целосна департизација на државните институции, почнувајќи од приемот на работа во администрацијата. Партизацијата разорно делува врз ефикасноста на државните институции и владеењето на правото – велат од ДС.
Партијата повикува да престанат партиските договарања преку селективна правда, амнестии и други лукративни цели, а наводно во интерес на повисоки цели.
