Пратениците во рамки на 91-та седница, денеска го изгласаа Законот за прекинување на бременоста. Во Собранието во прво читање, поминаа и измените на Законот за Владата на Република Македонија и претстои да бидат повторно разгледани во матичните комисии, по што пратениците ќе гласаат за нивно донесување.
Согласно новиот Закон за прекин на бременоста, се укинува тридневното чекање и останатите административни бариери за остварување на правото на абортус.
Со измените на законот, жената ќе добие комплетни, објективни и точни информации во врска со начинот на изведување на интервенцијата. Одлуката за прекин на бременоста, жената ќе може да ја донесе свесно, без принуда од кого било, врз основа на објективни информации поврзани со интервенцијата, со посебна медицинска интервенција за која слободно таа одлучува.
Во прво читање на 91-та седница, поминаа и измените на Законот за Влада, со кои се предвидува трансформирање на Секретаријатот за спроведување на Рамковниот договор во ново Министерство за политички систем и односи меѓу заедниците.
Пратеникот на ДУИ Ејуп Алими, на расправата за измените на законот рече дека формирањето на ова ново Министерство е неопходно и произлегува од анализата на Рамковниот договор од 2015 година, а поддршка дале сите партии.
Пратеникот од ДУИ Артан Груби истакна оти Рамковниот договор е веќе надминат и оти сега ќе се работи на негова имплементација, како и дека сите надлежности на Секретаријатот се пресликани во Министерството, а се додадени и нови.
Пратеникот од Партијата за Движење на Турците Енес Ибрахим истакна оти е потребно ова ново министерство, во духот на мултиетничкото општество, но посочи дека со предлог-законот не е прецизирано дали ќе се однесува на правата на помалубројните етнички заедници.
Во прво читање помина и Предлог-законот за инспекциски надзор.
Во прво читање помина и Законот за изменување и дополнување на Законот за организација и работа на органите на државната управа.
Пратениците го донесоа и Законот за ратификација на Конвенцијата на Советот на Европа за кинематографска копродукција, Законот за електронски документи, електронска идентификација и доверливи услуги, како и Законот за задолжителни резерви на нафта и нафтени деривати.
Собранието ја донесе Одлуката за испраќање на припадници на Армијата на Република Северна Македонија за учество во мировната операција „Одлучна поддршка“ во Авганистан.
Пратениците ја изгласаа и Одлуката за испраќање припадник на АРМ за учество во мировната операција на Европската унија „АЛТЕА“ во Босна и Херцеговина, како и Одлуката за испраќање на припадници на Армијата за учество во мировната операција на Организацијата на ОН „УНИФИЛ“ во Либан.
