На ѕидот од канцеларијата за контакти со граѓаните на пратениците од СДСМ во Прилеп осамна испишан графит „Локвенец и Кети – мртви сте ВМРО“. Случајот е пријавен во полиција и е направен записник.
Според Златка Пурковиќ, асистент на пратениците Хари Локвенец и Кети Смилеска, станува збор за чекор на безумие на политичкиот противник.
– Овој натпис најверојатно е напишан ноќеска. За мене е уште еден чекор на безумието на ВМРО-ДПМНЕ по оние неколкудневни напади на пратениците со протести пред нивните домови во Прилеп. Ова е и вандалски чин, бидејќи, да осудуваш луѓе на смрт кои се избрани од народот на регуларни избори, е навистина грозно. Порачувам дека ова не е време на „ќосињата“, туку време на демократија, а Хари Локвенец и Кети Смилеска се дел од тимот кој упорно работи на тоа. Инаку, оваа канцеларија постои 12 години и досега не се случило вакво нешто – изјави Пурковиќ.
Од општинскиот комитет на ВМРО-ДПМНЕ демантираат дека како партија стојат зад овие графити. Го осудуваат овој чин и бараат што побрзо да се најдат сторителите.
Преземањето на оваа содржина или на делови од неа без непосреден договор со редакцијата на Плусинфо значи експлицитно прифаќање на условите за преземање, кои се објавени тука.
loading...
