Премиерот Зоран Заев се извини откако денеска зборувајќи на одбележувањето на 76-годишнината од депортацијата на македонските Евреи во Треблинка, место „трагедија”, рече дека ,,Холокаустот е еврејска традиција”. Откако ваквата изјава предизвика реакции во јавноста, тој вечерва на Фејсбук се извини и објасни дека станува збор за ненамерна грешка.
– Во моето обраќање на денешниот настан по повод одбележувањето на 76 години од депортацијата на македонските Евреи во нацистичкиот логор Треблинка и официјалното отворање на музејската поставка во Меморијалниот центар на холокаустот, направив ненамерна грешка.
Во делот од говорот кој гласи: „Холокаустот не е само еврејска трагедија, ниту само една темна страница од Втората светска војна. Со сиот свој ужас, овој геноцид е предупредување и лекција за сите нас, од сите вери, за сите времиња“, наместо зборот „трагедија“, ненамерно го искажав изразот „традиција“.
Секако се работи за ненамерен лапсус, грешка заради која изразувам извинување. Уверувам дека моето обраќање во целина и недвосмислено го одразува духот на осуда на геноцидот врз еврејскиот народ и на сочувството со семејствата на жртвите на холокаустот.Грешката не е објавена на веб страницата на Владата за да не повреди ничии чувства, напиша Заев на Фејсбук.
