Поранешниот претседател на Еврогрупата, Јерон Дајселблум во интервју за грчката новинска агенција АНА-МПА, вели дека Зоран Заев и Алексис Ципрас покажаа лидерство за постигнување на Договорот од Преспа, направија чекор напред за соработка меѓу двете земји, јави дописничката на МИА од Атина.
– Во надворешниот свет, иако знам дека е контроверзно или чувствително прашање за Грција, се третира како одличен договор. И двајцата премиери беа меѓународно пофалени за покажаните лидерски способности, бидејќи станува збор за многу чувствителни прашања за историјата и идентитетот. Особено овие прашања бараат лидерски способности за да направиш чекор напред, а зад себе да го оставиш минатото за двете земји веќе да бидат добри соседи и да соработуваат. Така што, мислам дека е нешто многу позитивно и придонесува во позитивна атмосфера што постои во Грција во моментов – вели Дајселблум за АНА-МПА во однос на важноста на Договорот од Преспа.
Фото: EPA/SIMELA PANTZARTZI
