На огласот за вработување на доктори на медицина во Клиничката болница во Тетово не се испочитувани правилата, односно примањето на кандидатите воопшто не било направено според бодовната ранг листа, а некои од кандидатите кои се примени, воопшто и ги нема на ранг листата!, тврдат од Асоцијацијата на специјализанти и млади лекари АСМЛ. Освен за тетовската болница, на Фејсбук страната на оваа асоцијација има коментари дека на сличен начин, наводно, биле примени на работа и лекари и во болницата во Битола.
Од АСМЛ вчера на својата Фејсбук страница ја истакнаа и ранг листата и конечната одлука за прием, што ја донела комисијата за селекција при Клиничката болница во Тетово.
„Властите, ЛКМ и ЗЛС молчат, ние не!
Каков е овој скандал и неправда!
Првата слика е ранг листата, а втората примени кандидати, срамота!
Бараме одговорност за ова!
Споделете!
Нас нѐ интересира вистината и правдата!
Еве ранг листа на сите кандидати, еве и одлука кои се примени, сами проценете!“, напишаа на Фејсбук од Асоцијацијата на специјализанти и млади лекари.
