Во Кривичниот суд во Скопје денеска треба да се одржат нови рочишта за случаите „Титаник“ и „Насилство во општина Центар“ на Специјалното јавно обвинителство.
Судењето за изборни нерегуларности „Титаник“ се наоѓа во доказна постапка и треба да продолжи со изведување на материјално докази. Меѓутоа, неизвесно е дали ќе се одржи ова рочиште со оглед на тоа што за денеска се закажани завршни зборови и за „27 април“ каде обвинет е Мунир Пепиќ, кој е на обвинителна клупа и за изборните нерегуларности.
Во „Титаник“ обвинети се поранешниот премиер Никола Груевски кој е во бегство во Унгарија, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за за финансирање изборна кампања.
Рочиште треба да се одржи и за предметот „Насилство во општина Центар“ во кој за насилствата пред општинската зграда на 10 јуни 2013 година обвинети се повеќе лица, меѓу кои поранешниот премиер Никола Груевски, екс министер за транспорт и врски Миле Јанакиески, актуелната пратеничка во Собранието Даниела Рангелова и тогашниот советник во општина Гази Баба Александар Трајковски.
