Судскиот совет на Република Македонија на денешната седница ги усвои правилниците за додатоци на плата, нивната висина и начинот на утврдување за членовите на Судскиот совет, на судиите, како и на судските службеници. Судскиот совет ќе ги достави правилниците на одобрување до Министерството за финансии.
– Никој да нема претензии дека судиите и судските службеници секој месец откако ќе стигне согласноста од министерот за финансии ќе добиваат додатоци на плата до 35 отсто. За тоа нема пари. Можеби нема да остане ниту еден денар и нема воопшто да биде исплатен додаток, иако тоа стои како право. Сѐ зависи од искористеноста и законската можност да пренамениме определени слободни средства за оваа намена, бидејќи не се обезбедени од Министерството за финансии преку буџетот – рече претседателот на Судскиот совет, кој е и претседател на Судскиот буџетски совет, Зоран Караџовски, одговарајќи на новинарско прашање по денешната седница.
Тој додаде дека доколку не се обезбедат тие средства би предложил да се избришат ваквите додатоци и да не постојат како законско право.
– Сѐ уште нема формално-правна можност за исплата на такви додатоци за оваа година. За јануари нема ниту за судиите, ниту за судските службеници сé додека не добиеме согласност на правилниците од Министерството за финансии – рече Караџовски.
Во барањата за буџетот за 2020 година како што ќе се бараат средства за додатоци на платите за судиите ќе се бараат и за судските службеници. Меѓутоа, досега иако три години постои Законот не се одобруваат средства од извршната власт.
Вкупно 207 вработени во судската служба и судската полиција од скопскиот Кривичен суд до Судскиот совет испратиле барање за исплата на додаток на плата од 35 отсто до крајот на јануари, во спротивно, како што најавиле, ќе стапат во штрајк.
Како што рече Караџовски, невозможно е за два дена да бидат исплатени додатоците за плата, бидејќи правилниците, иако се усвоени од СС, треба да добијат согласност од Министерството за финансии.
