Вицепремиерот Бујар Османи ја искористи денешната прес-конференција во Владата посветена на интеграциите и реформите да се пофали дека ја имал честа прв да зборува на албански јазик на една владина седница, бидејќи денешната е прва откако Законот за јазиците стапи на сила.
Тој неговото обракање го посвети на евроинтеграциите и реформите потенцирајќи дека планот за реформи 3-6-9 е реализиран 95 отсто, а со иста динамика се движи и планот 18.
– Вчера имав можност да бидам во Романија, која претседава со ЕУ, на состанок со највисокото раководство да им кажам „господа ние го испорачавме нашиот дел и сега очекуваме договор да се испорача кон нас“, а тоа е Македонија да стане членка на НАТО и да почне преговори со ЕУ. Впечатокот таму е дека Договорот од Преспа е дипломатско чудо кое не само што нам ќе ни го отвори евратланската перспектива, туку ќе биде и пример за регионот – рече Османи.
Тој кажа дека утре заминува за Финска, која следна ќе претседава со ЕУ, што е важно за Македонија, бидејќи за време на тоа претседателство би требало да се одржи првата меѓувладина седница која де факто е почеток на преговорите. Потоа, рече тој, следна е Хрватска како претседавач во чиј мандат Македонија треба да го отвори и првото поглавје.
Османи е убеден дека реформите ќе се реализираат и дека нема да има земја и организација која нема да го признае напредокот.
– Потоа само небото е граница – рече оптимистички Османи.
