Пратениците во грчкиот Парламент штотуку го ратификуваа Договорот од Преспа со 153 гласа „не“, што значи „да“. Со „охи“ што значи „против“ гласаа 146, а еден беше „воздржан“.
Официјалните бројки од гласањето треба да ги потврди и претседателот на Парламентот.
Премиерот на Грција, Алексис Ципрас, успеа да обезбеди апсолутно мнозинство гласови.
Пратениците гласаа поименично и кажуваа дали се „за“, „не“ или „воздржани“.
Позитивно за решението на деценискиот спор меѓу Македонија и Грција гласаа 145 пратеници од СИРИЗА (целата пратеничка група), седум независни пратеници и еден пратеник од Независни Грци.
Осумте пратеници кои го поддржаа Договорот од Преспа се: претседателот на Демократска левица, Танасис Теохраопулос, кој беше избришан од коалицијата Демократска алијанса, сега независен пратеник; Спирос Данелис, кој беше избришан од Река, сега независен пратеник;,Ставрос Теодоракис, Јоргос Мавротас и Спирос Ликудис, од Река, кои по распадот на пратеничката група официјално се независни пратеници; Елена Кундура, министерката за туризам, поранешна членка на Независни Грци, сега независна пратеничка; Катерина Папакоста, заменик министерка за цивилна заштита, сега независна пратеничка; Танасис Папахристопулос, пратеник од Независни Грци.
Пленарната седница за ратификација на Договорот започна во средата наутро, а расправата траеше 38,5 часа.
Откако Преспанскиот договор влезе во Парламентот, во Атина се организираа протести од противниците на договорот, беа забележани низа инциденти, фрлање молотови коктели кон домови на пратеници, а имаше и обид за влез во зградата на Парламентот.
Македонската јавност, според најавите, во наредните неколку недели ќе биде во очекување на уште едно гласање од страна на грчките пратеници, но сега за пристапниот протокол за НАТО за Република Северна Македонија.
Грција, според договорот, треба да биде првата земја која ќе даде зелено светло за членството во Алијансата. За тоа да се случи, Македонија треба прво да го потпише пристапниот протокол што, според изјавите на владини претставници, може да се очекува во наредните неколку недели.
