Шефот на македонската дипломатија, Никола Димитров, вели дека му е чест што се споменува како еден од можните кандидати на СДСМ на претстојните претседателски избори, но напоменува дека сега е момент кога фокусот треба да се стави на профилот на идниот претседател, кој и е потребен на државата.
Димитров во емисијата Топ-тема на Телма нагласи дека по повеќе анализи на оваа идеја, на аргументите за и против не ја исклучува оваа можност, но додаде дека мошне важна улога сега имаат анкетите и мислењето на граѓаните.
-Чест ми е што моето име се споменува, имам лични дебати, кој е минусот, плусот. Важна улога тука имаат анкетите, што мислат граѓаните, коалициските партнери. Сега сме во една фаза дека треба да мислиме на профилот за тоа каква личност ни треба имајќи ги предвид лекциите што ги имавме изминатите десет години, рече тој.
Во врска написот на портал на албански јазик во кој се наведува дека Димитров во минатото ја поддржувал националистичката позиција на Груевски во преговорите, но и бил против Охридскиот договор, тој нагласи дека секој што го познава од 2001 година знае дека работел на зачувување на Македонија, на смирување на работите.
-Малку загрижува начинот на кој водиме политика, ова е еден од примерите на старата политика, оцрнување. Треба да се префрлиме на еден позитивен натпревар, кој како работи, кој колку работи, малку меѓусебна поддршка, ова црнење на противникот во наводници мислам не е корисно. Време е со многу поголема отвореност, искреност, со еден позитивен натпревар што сите ќе не поттикнува да бидеме подобри, така да си ги мериме силите, рече Димитров.
