Владата го финализираше Преспанскиот договор со кој, по исполнувањето на обврските и од двете страни, ќе се овозможи полноправно членство на Македонија во НАТО со што ќе се зајакне стабилноста и безбедноста на нашата земја и на регионот и ќе се намалат ризиците од таков вид. Веќе за неколку седмици Македонија ќе се стекне со право да присуствува и да изнесува мислење на сите состаноци на Алијансата.
Ова го изјави министерката за одбрана Радмила Шекеринска на средба со делегација на Европскиот директорат за надворешни активности предводена од директорот за кризен менаџмент и планирање, Габор Инклоди. редбата се случува по неполни два месеци од доставената иницијатива од наша страна Македонија да биде вклучена во европскиот проект за процена на хибридните закани, на која добивме позитивен одговор.
Шекеринска информира дека Министерството за одбрана ја презема водечката улога на координатор на целиот процес за што веќе е формирано тело и е именуван национален координатор и негови заменици кои се експерти во областа. Во процесот, истакна министерката, ќе учествуваат 27 институции.
Министерката дополни и дека македонската Влада промовира нова политика на создавање на пријатели наместо непријатели и дека со цел да внесе дух на соработка и помирување во регионот се фокусира на градење мостови и пријателства со соседите. Притоа таа го наведе и Договорот со Република Бугарија, покрај Договорот со Република Грција, како уште еден мост на пријателство и соработка и подвлече дека Македонија е редок пример на држава во регионот која нема отворени прашања со соседите.
Од европската делегација потенцират дека државите од Западен Балкан не се само партнери туку и идни членки на ЕУ и дека цврстите врски со нашата земја се на високо место во агендата на Брисел.
Шекеринска ги информираше европските претставници дека Министерството за одбрана ја искажа својата посветеност на овој процес и преку писмо до Федерика Могерини и изрази задоволство од брзиот одговор и поддршката од ЕУ. Во рамки на посетата на европската делегација се одржа и тркалезна маса на која гостите од ЕУ и нашето Национално координативно тело дискутираа за следните чекори и временските рокови за нивно извршување.
