Министерот за информатичко општество и информатика, Дамјан Манчевски, на Твитер испрати порака до ракометарите порачувајќи политиката да се тргне надвор од спортот.
„Политиката надвор од спортот. Поздрав до репрезентативците – политичари. Доста делби“, напиша Манчевски.
Ваквата порака на министерот следува откако имаше низа ситуации во кои се испреплетоа политиката и спорот.
Прво, непосредно пред Нова година, ракометарот Стојанче Стоилов ја напушти манифестацијата Спортист на годината поради двојазичниот карактер кој го доби таа.
Со стартот на Светското првенство во ракомет во Германија и Данска на кое настапува и нашата репрезентација Стоилов повторно имаше порака за промената на името. Уставните амандмани се изгласаа во ист ден кога ракометарите го отворија првенството, а попладнето репрезентативниот пикер се јави со порака.
„Ментално нестабилни сме сите у државава што дозволуваме вака да ни прават!!! Срам да ни е на сите… За мене секогаш ќе биде МАКЕДОНИЈА!!!“, напиша Стоилов.
Коментаторот на вториот програмски сервис на МРТВ кој се емитува на албански јазик, пак, во известувањето не сакаше да го каже со име и презиме Стојанче Стоилов туку го ословуваше со „играчот со број 5“.
Ракометарот не сакаше да го коментира тоа, а од МРТВ најавија санкции за новинарот.
Во екот на случувањата со промената на името, порака имаше и голманот Борко Ристовски, кој додека се интонираше македонската химна го покажа симболот на обединета Македонија.
