Обвинителката Вилма Русковска во воведниот говор за обвинението за крвавиот четврток, рече дека на 27 април 2017 година се случил напад врз една од најважните институции во државата, македонското Собрание.
– Крвавата глава на Зоран Заев, нападот на Радмила Шекеринска и на Зијадин Села ќе останат длабоко вмрежани во меморијата на граѓаните – рече Русковска.
Таа објасни што се случувало на 27 април. Сè почнало во 14.39 часот кога Благоја Василевски, телохранителот на Никола Груевски, од број, сопственост на Секторот за општи и заеднички работи при Владата му свртел на неговиот брат, обвинетиот Александар Василевски Нинџа, наводно да го праша за здравјето на нивната мајка. Потоа следуваат разговори на Александар Василевски и обвинетиот Никола Митревски Кољо за организација на нападот во Собранието.
– Во кафе барот „Дион“ во ГТЦ, се собираат околу 68 лица од Скопје и од другите градови, меѓу кои и припадници на патриотските здруженија. По наредба на Александар Василевски Нинџа и Никола Митревски Кољо, Стефан Младеновски од продавницата „Камуфлаж“ купува 30 маски, наречени фантомки. Во 16.15 часот се враќаат во „Дион“ и на Нинџа му ја покажал кесата со фантомките. Еден час потоа, по наредба на Нинџа, Стефан Младеновски со Филип Спасовски Шеќер, одат во „Камуфлаж“ каде докупуваат 30 маски – рече Русковска./ Макфакс
