Претседателот на Кривичниот суд во Скооје, Иван Џолев, не смета дека министерот за внатрешни работи Оливер Спасовски, ги прозива судиите од скопскиот суд на чие чело е тој.
– Јас лични сметам дека кога министерот ги прозива обвинителите и судиите во врска со неопределувањето мерки, не посочува со прст кон судиите од Кривичен. Овој суд е апсолутно независен, ние како суд се имаме оградено од сите можни влијанија, одлуките кои се носат се избалансирани и правични – рече Џолев на брифингот со новинарите.
Ваквиот негов коментар доаѓа откако неодамна министерот Спасовски повторно го коментираше правосудството и рече дека треба да се отворат истраги и за судиите обвинители и припадници на МВР. Не е прифатливо, изјави министерот, МВР да отвора случаи, да ги води, да се дојде до ситуација на покренување истрага, апсења и по неколку часови тие исти луѓе да бидат пуштени од страна на судот.
Во судот, посочуваат дека можеби одговорот треба да се бара на друго место, а во таа насока ги споделуваат и нивните статистики. Според нив, во текот на 2018, СЈО барало притвор за 6 лица, од кои четворица се осомничени во „Империја“, меѓу кои и Сашо Мијалков и Орце Камчев. Кривичен тогаш одобри притвор за четворицата од „Империја“, кој потоа беше преиначен од Апелација во домашен за на крај Врховен да го укине.
Обвинителството за гонење организиран криминал и корупција, пак, лани барало притвор за вкупно 123 лица, а од Кривичен одобриле притвор за 121. За куќен притвор имало 2 барања, и двете биле одобрени.
