Самостојниот синдикат на новинари и медиумски работници (ССНМ) ќе доделува годишна награда „Медиум промотор на новинарството како јавно добро“, која ќе го носи името на прерано починатиот борец за слобода на изразување и експерт за медиуми – Роберто Беличанец.
Синдикатот ја воспоставува годишната награда, тргнувајќи од премисата дека демократско општество кон кое Македонија се стреми е можно само доколку новинарството се третира како јавно добро, како инструмент преку кој власта е под постојана контрола и преку кој се заштитува јавниот интерес, наведува самостојниот синдикат.
ССНМ истакнува дека медиумите се платформата преку која новинарите и медиумските работници комуницираат со граѓаните и без слободни медиуми кои го разбираат концептот на јавно добро и јавен интерес не е можно остварување на потребното влијание за исполнување на главната функција на новинарството.
Самостојниот новинарски синдикат ги повикува сите новинари и медиумски работници да номинираат медиум за кој сметаат дека го заслужува ова признание кое сметаме дека ќе биде не само поттик за медиумот, туку и за новинарите и медиумските работници.
Признанието ќе се додели на медиумот кој ги задоволува следниве критериуми – континуирано чувство за општествена одговорност, третирање на новинарството како јавно добро преку залагање за слобода на изразување, придржување до кодексот на новинари, третирање на теми од јавен интерес… како и коректен однос кон вработените – почитување на нивните работнички и професионални права.
Комисијата за избор на добитник на оваа награда номинации ќе прима до 7 декември, а новинарите и медиумските работници номинациите може да ги испраќаат по електронска пошта на ssnm.info@gmail.com или на Фејсбук страната на ССНМ (https://www.facebook.com/
Оваа награда ССНМ ја доделува во партнерство со Македонскиот институт за медиуми – МИМ, Институт за комуникациски студии и Media Diversity Institute oд Лондон во рамки на проектот „Писменост за вести и дигитална писменост- Справување со лажните вести“, поддржан од Европската Унија.
