Собраниската Комисија за политички систем и односи меѓу заедниците денеска не го разгледуваше Предлог на законот за изменување и дополнување на Законот за празниците, поднесен од пратеници од сите пратенички групи.
Претседателот на Комисија, Александар Кирацовски на крајот од седницата кажа дека измените на овој Закон ќе се разгледуваат на истата седница, која треба да продолжи следната недела.
Како што објавивме во минатата недела, се предвидува да се воведат десет нови празници за заедниците кои во Преамбулата на Уставот се наведени како „други“.
Со ова, свој ден за славење ќе добијат Словенците, Унгарците, Полјаците, Балканските Египќани, Хрватите, Црногорците, Ерменците, Бугарите, Грците и Русите кои живеат во Македонија.
Ова е предлогот на група пратеници за измена и дополнување на Законот за празниците , кои предлагаат и промена на името на законот во закон за празниците на Република Северна Македонија.
Пред да бидат разгледани на оваа Комисија, за Предлогот треба да расправа Комитетот за односи меѓу заедниците, но ова собраниско тело се уште нема закажано седница.
Членовите на Комисијата за политички систем и односи меѓу заедниците денеска го разгледаа Годишниот извештај за работата на Советот за јавни обинители на Република Северна Македонија за 2019 година. Пратениците изнесоа забелешки за содржината на Извештајот посочувајќи дека тој содржи само статистички податоци и оти во него нема аналитички пристап за тие да добијат комплетна слика за работата на Советот и на обвинителите во целина. Најголем дел од нив сметаа дека извештајот е сличен на оној од 2017 година.
Коле Штериев, претседателот на Советот повикувајќи се на изрека на старите римјани, меѓу другото кажа дека, „формата е содржината“ и оти Годишниот извештај бил прифатен од страна на членовите на Советот, дообјаснувајќи притоа одредени детали на прашања на пратениците.
Снежана Калеска Ванчева од СДСМ кажа дека од извештајот се гледа дека „не мрднале многу работите“ во Советот во споредба со 2017 година и посочи дека во одноредени обвинителства, како на пример во Крива Паланка се уште нема избрано обвинители. Тој не се согласува дека Советот доставил Извештај од кој не може да се види нивната работа.
Штериев, на нејзиното, а подоцна и на прашања на пратеници од опозицијата, објасни дека недостасуваат обвинители и оти нивната проекција е дека во земјата има потреба од 238 обвинители а се пополнети само 190 места. Проекцијата на Советот е дека во наредните две години ќе има потреба од 65 нови обвинители, не земајќи предвид каков ќе биде решението за Специјалното јавно обвинителство. Во 2018 година биле избрани 25 нови обвинители. Дополнително, за некои обвинителски места како во Крива Палнка или Берово немало кандидати. Штериев кажа и дека после три години во август треба да излезат нови обвинителски кадри од Академијата за судии и обвинители.
Во 2018 година, Советот постапувал по вкупно 201 претставки, што во однос на 2017 година кога биле евидентирани 166 претставки е зголемување на обемот на работа за 35 претставка или 24 отсто.
Од вкупно 201 претставки, 178 се претставаки од граѓани, 165 претставки поднесени се од оштетени, осум се обвинети и пет се од други субјекти.
Вo 62 случаи претставките се однесуваат на работата на конкретни јавни обвинители, а во 139 претставки е изразено незадоволство од работата на Јавните обвинителства.
Пратениците забележаа и дека во Извештајот не е наведено за кои јавни обвинители се однесуваат овие 62 претставки. Зоран Илиоски од ВМРО-ДПМНЕ се интересираше и колку дисциплински постапки поднел Советот за работата на обвинителите, на што Штериев кажа дека Советот нема ингеренции за поведување вакви постапки. Претседателот на Советот на јавни обвинители истакна и дека врз основа на поднесените претставки немало причина за барање за разрешување на обвинител.
Советот, според него, дали мислења за некоја од верзиите за законите кои се однесуваат на нивната работа, но оти не е информиран дали и колку се тие прифатени.
И покрај се, додаде тој, недостатокот на кадар и условите кои кои работат обвинителите, нашата работа е завршена.
– Државата треба да се запраша дали и каков Совет на обвинители ни треба – рече Штериев одговарајќи на прашање на Нада Ципушева од ВМРО-ДПМНЕ.
На седницата на Комисијата за политички систем не беше прифатен предлогот на пратениците од ВМРО-ДПМНЕ за измени на Законот за прекршоци.
